Fahasoavana be izany! Iza moa izaho sy ianao no hirahina hisolo an'i Kristy? Mirehareha ery ny iraka mikabary hoe : "Misolo-tena ny filoham-pirenana na minisitra aho! ". Iza moa maniraka anao? Jesoa ilay manana ny fahefana rehetra any an-danitra sy ety an-tany! Dia handà ve sa hiteny hoe : "Tsy mendrika?". Tsy mahalala an'i Jesoa ary tsy nandray famonjena izay tsy mety hirahina. Voninahitra an-tsobiky aza atao am-patambary. Manam-boninahitra ianao, iraka solon'i Kristy. Manàna fiainana sy fitondran-tena mendrika izany. "Tanteraho ny fanompoana". Aoka ho hita aminao Jesoa!

Vavaka: Misaotra anao izahay Jesoa fa nitokisanao ho iraka hisolo Anao. Amen