Ny olona mino dia tsy baikon'ny hitan'ny maso sy ny ren'ny sofina. Mahay mangina manoloana ny toe-javatra mampitroatra ary manana fahatoniana rehefa miatrika zava-tsarotra. Mahita an' Andriamanitra Izay lehibe noho ny olana sy ny olona ny mino. Hoy ny mpanao Salamo : "Manopy ny masoko ho amin'ny tendrombohitra aho; Avy aiza ny famonjena ahy? Ny famonjena ahy dia avy amin'i Jehovah, Mpanao ny lanitra sy ny tany." - Salamo 121: 1- 2. Manàna toe-panahy mifantoka any amin' Andriamanitra mandrakariva tahaka an'i Davida niteny hoe : "Eny, na dia mandeha mamaky ny lohasaha aloky ny fahafatesana aza aho, dia tsy hatahotra ny loza aho, fa Hianao no amiko;" - Salamo 23:4